Látlaus kápumynd HEIÐARPRJÓNS segir ekki alla söguna, því þessi bók hefur að geyma margar mjög fallegar peysuuppskriftir og er að margra mati ein eigulegasta bókin frá Lene Holme hingað til. Lene er flestum prjónurum vel kunn fyrir fallegar uppskriftir fyrir börn og fullorðna. Hér leggur hún áherslu á klassíkina, peysur sem eru bæði einfaldar og aðeins flóknari í prjóni, en eiga það sameiginlegt að eiga eftir að verða notaðar mikið og lengi.

Í bókinni eru 25 prjónauppskriftir að flíkum fyrir konur, flestar í stærðum frá XS upp í 4XL.

Uppskriftirnar eru að peysum, bæði hnepptum og heilum, en einnig eru uppskriftir meðal annars að kjól, pilsi, vesti, sokkum og vettlingum.

Í bókinni er einnig að finna upplýsingar um margs konar prjóntækni s.s. kaðla, úrtökur og útaukningar, ýmsar aðferðir við að fitja upp og fella af, styttar umferðir og margt fleira.

Lene Holme Samsøe er vel þekkt og vinsæll prjónhönnuður í Skandinavíu. Hún hefur sent frá sér fjölmargar uppskriftabækur sem njóta mikilla vinsælda og Heiðarprjón er fimmta bókin sem kemur út eftir hana á íslensku.

Ásdís Sigurgestsdóttir og Guðrún B. Þórsdóttir þýddu.