Zauberball er garnlína frá Schoppel Wolle sem er seld í hnyklum og hönnuð fyrir prjónara og heklara sem eru óhræddir við liti og vilja spennandi garn. Zauberball Crazy er kaflalitað og sprengt ullargarn með styrkingu sem gerir það upplagt í sokkaprjón. Einn hnykill dugar í fullorðinspar og sokkarnir verða einstakir, hver um sig.

En þetta skemmtilega garn er líka frábært í peysur, trefla og fleira. Margir nota það í mynsturlit í tvíbanda vettlingum. Þá kemur á óvart hvað það nýtur sín vel í mósaíkprjóni. Þá er prjónað með tveimur litum og ef þetta garn er notað dugir að taka innan úr hnyklinum (sem er ekkert mál) og svo utan af þegar prjónað er.

Hekluð sjöl og heklaðar værðarvoðir eiga líka vel við þetta garn því litaskiptin koma svo skemmtilega út.